لهواة اللاسلكى اول معلومة تعرفها عن الوايرليس الفرق بين ال dbm و ال dbi و الmw و كيفية حسابهم ..شادى سوفت

إيه الجهاز ده ؟

ده جهاز بيقيس الاشارات اللاسلكية ب 1895 دولار

سامعك يا واد ....ده للناس المحترفين بس

-----------------------------------

تعالوا نتكلم النهارده عن ال dbm و ال dbi و ال mw و بتلخيص شديد علشان الناس تفهم

- ال dbm هى وحدة بيتقاس بيها قوة الاشارات اللاسلكية و طبعا كل اجهزة البث اللاسلكية بيكتب عليها قوتها بال dbm و كل لما تزيد قوة الاشارة اللاسلكية يزيد

- ال dbi هى وحدة قياس إشعاعية بيتقاس بيها قوة تركيز و إنتشار الاشارات اللاسلكية و طبعا كل هوائيات البث بيتكتب عليها قوتها بال dbi و كل لما تزيد قدرة الهوائى على التركيز و الانتشار البث يزيد....تخيل معايا انك ماسك كشاف نور طبعا متركب فى مقدمته عاكس فضى و عدسة بيركز بيهم اشعة النور و بيوجها على حساب اتجاهات أخرى اهو الى حصل بالعدسة و العاكس من تركيز للاشعة بيتقاس فى علم الشبكات اللاسلكية بالdbi

- فى بقى وحدة قياس بيشترك فيها ال dbm و ال dbi وهى وحدة قياس كهربية إسمها الملى وات mw و دى بقى عفريت الشبكات لانها ممكن تحرق شبكة و ممكن ترفع شبكة فى السماء ودى حتكلم عنها بإستفاضة و علفكرة هى بتتكتب على علب اجهزة البث اللاسلكية جنب ال dbm و مبتتكتبش على الهوائيات لاسباب انا حقولها

- كل لما اجهزة البث اللاسلكى ال dbm يعلى فيها, ال mw لازم يعلى لانه بيمثل قوتها الكهربية و المعادلات بتقول كده

- كل لما الهوائيات ال dbi يعلى فيها ,ال mw حيبقى فيه فقد أكثر لعدة اسباب من ضمنها: على سبيل المثال مقاومة السلك الى راكب ما بين الهوائى و جهاز البث... و الهوائى نفسه له مقاومة و مننساش كمان استهلاك الهوائى للملى وات لتكوين منطقة اشعاعية للبث.....يعنى ميجيش واحد فكيك أوى معندهوش فكرة عن البطيخ يركب على كارتة لاسلكية عادية هوائى بقدرة 15dbi و يقولك ده مفرقش عن الايريال ال2dbi الراجل ده لازم نفهمه انه خارج الملى وات من الكارتة هو 50 ملى وات و الى حيتفقد فى مكونات الهوائى و بالتالى الهوائى مش حيطلع غير صوت فس س س.....يعنى بالعربي لازم لكل كبير الى اكبر منه......هوائى 15dbi محتاج على الاقل يدخل له 500 ملى وات و طالع و ده بيكون باستخدام كارت لاسلكى بخارج عالى أو أمبلفير (مكبر إشارة)

ميجيش واحد افكس من الفكيك و يركب كارتة لاسلكى بخارج عالى و يركب عليها مكبر اشارة من غير ما يقرأ هو الدخل بتاعه كام علشان ميتحرقش المكبر و الايريال يضرب ده غير الكارتة و الجهاز الى ركبة عليها

- بالنسبة لموضوع الملى وات تخيل معايا انك جناينى و ماسك طرف خرطوم المية (dbi) بتسقى بيه.... كل لما ضغط المية (ملى وات) يزيد مدى رش المية (dbm) حيزيد و لو ضغطت بأيدك على مقدمة الخرطوم (براعة تصميم الهوائى) المدى حيزيد أكثر بنفس كمية المية

- طيب تعالى بقى نتخيل شخص راح جاب خرطوم انبوبة بوتجاز ووفقه مع حنفية المية بتاعة الجنينة حيحصل ايه؟....الجواب هو انه كتم المية!...يعنى كتم الاشارة....زى الى راح جاب سلك الدش الى مقاومته 75 اوم و ركبه بدل الاسلاك المخصصة للشبكات اللاسلكية الى مقاومتها 50 أوم فأقل!

- الى يجيب سلك مقاومته 75 أوم و يركبه زى الى يركب سلك 50 أوم طويل جدا .....يعنى بالعربى يستحسن السلك بين الهوائى و جهاز البث لا يتعدى المتر و مقاومته تكون ضعيفة قدر المستطاع

يعنى بوضوح اكثر الخرطوم (السلك) المستخدم لو ضيق (مقاومة عالية) المية (الاشارة) حتبقى ضعيفة

- فى ناس حتقول منجيب سلك رفيع و نركبه....لا طبعا لان كده الملى وات حيضعف و قوة الاشارة حتبقى ضعيفة....بالعربى محدش يفتكس لان الاسلاك المخصصة للشبكات محسوب معدلاتها بدقة و يا ريت تكون من مصدر موثوق فيه مش صينى درجة 3 و مكتوب عليه 50 أوم و هى 100 أوم


أمثلة على نسب معروفة و مسلم بها عبر المعادلات الحسابية:
- واحد mw = صفر dbm
100 ملى وات = 20 dbm
1000 ملى وات = 30 dbm
2000 ملى وات = 33 dbm
3000 ملى وات = 35 dbm
4000 ملى وات = 36 dbm

كل 1000 ملى وات معناها واحد وات يعنى 1000mw=1w

---------------------------------------------------------------------------------------------------------------
مثال عملى عن كيفية حساب ال dbm و ال dbi و الmw:

معظم الهوائيات الصغيرة المرفقة مع الكروت اللاسلكية قوتها 2dbi و هو مكتوب على العلبة

تلك الانواع من الهوائيات قلاوز اى بدون سلك اى معامل فقد الاشارة اللاسلكية فى السلك هو صفر

معادلات حسابية مسلم بها:
16dbm=40mw
17dbm=50mw
18dbm=63mw
19dbm=79mw
20dbm=100mw

المعطيات :معظم الكروت اللاسلكية العادية قوتها 17 dbm فأعلى و معها هوائى بقوة 2dbi و صفر كمعامل فقط السلك لعدم وجوده أصلا

و من الجدول السابق نجد أنها بقوة 50 ملى وات +هوائى 2dbi = قوة إشعاعية 79mw

عرفت منين ؟.....الاجابة من الآلة الحاسبة الخاصة بمحترفى الشبكات اللاسلكية http://www.wifinerd.com/wifi-calculators.html

طيب ليه بقى الهوائيات مبيتكتبش عليها الملى وات؟
لان الملى واط عموما بيختلف على حسب قدرة mw الجهاز الى راكب عليه الهوائى....يعنى ممكن واحد يركب هوائى 15dbi على كارتة عادية و ممكن على أمبلفير و النتيجة طبعا طردية و المعادلات بتقول كده

كارت (100 ملى وات) 20dbm+هوائى 15dbi=قدرة بث 3162 ملى وات
امبلفير (1000 ملى وات) 30dbm+مقاومة سلك (2db)+هوائى 15dbi=قدرة بث 19953 ملى وات

انا حنتهز الفرصة دى و اقدم لكم هدية و هى عبارة عن آلة حاسبة محترمة للمحترفين فى عالم الشبكات

معاينة