وجود تعارض فى الايبى..الماك متكرر..السطور الزرقاء فى اللوج مشاكل وحلول فعلية..شادى سوفت

السلام عليكم اعضاء المنتدى الكرام

بداية المشكلة منذ شهر تقريبا كل يوم النت يتقل بالليل..بلاغات من المشتركين بوجود تعارض فى الايبى دوما...ناس وهى بتحمل فجاة يبقى التحميل صفر مع ان فيه تصفح..تفتح الوينبوكس علشان تشوف السيرفر تلاقى كارت الخروج بيقول لك فيه 3 او 6 ميجا داونلود و 3 او 6 ميجا ابلود مع ان سرعتك كلها 1 او 2 ميجا فقط بالرغم ان كارت الدخول بيوقلك ان المسحوب من الروتر لا يتخطى 50 كيلو؟؟..

علامات استفهام كتير جدا هاتلاقيها...
الشك طبعا فى اوتوماتيك بالشبكة...معلومة صغيرة كده على الهامش انا عندى قطعة ناناو استيشن ام فايف واخد منها 12 قطعة كل قطعة فوقيها بيكو او بوليت وسيكتور او هايبر..وفيه من ال 12 اللى واخدين عملت محطة تانية واخد منها 6 قطع كل قطعة فوقيها برضه بيكو او بوليت وهايبر او سيكتور....يعنى العدد كبير علشان تشك فى اوتوماتيك طيب جاى لك من اى نقطة وخصوصا فى موضوع اللاسلكى ماشى مناطق متفرقة اقصاها صحيح 4 كيلو لكن ال 4 كيلو دول جوى لكن لو مشيت فى الطرق علشان توصل فيها ولا 15 كيلو طرق وحوارى ومناطق مهجورة وترع ومصارف بتلف من حواليها وهكذا..
الموضوع كبير ومتعب جدا جدا..

طبعا فى الصور اللى هانزلها هنا المشكلة واضحة من جوه السيرفر فى الاوتوماتيك والرسايل الزرقاء دى مشكلة مهولة...كل المشتركين يظهر لهم كونفليكت ايبى حتى اللى كاتب ايبيهات..لان الماك اللى هاتشوفوه ده رص الشبكة كلها بالاجهزة بماك واحد فقط...حاجة عجيبة...
طبعا بداءت بالسويتشات الارضى بتاعتى وعددها كبير جدا لكن بداء بالرئيسى افصل جزءجزء وناحية ناحية...لسه القفلة برضه..غيرت السويتشات وغيرت السلك..القفلة هدت..فكرت انى حليت المشكلة لكن للاسف متحلتش وعرفت فى الاخر السبب وهاقولكم السبب..

المهم توجهت لللاسلكى واهو ده مشكلة لوحده لكن تغلبت عليها بانى افصل ماك ..يعنى تعمل حجب للاجهزة واحد تلو الاخر وبرضه مافيش فايدة..المشكلة مكنتش فى الحجب المشكلة كانت فى ان البينج حتى وانا تحت الجهاز ال ام فايف عالى جدا ومش عارف تدخل على الجهاز بل وكمان البينج بيقطع....
اضطررت لفصل المحطة الاستقبال اللى طالع منها محطة ارسال اخر..وهنا نجحت فى غلق القفلة اللى ف الشبكة والنت اشتغل سليم..طبعا وجهت كل طاقتى للجزء ده وال 6 قطع اللى واخدين منه..حجبتهم قطعة قطع..لحد ماوصلت للسبب؟..وللاسف السبب لوكو ام فايف اتجننت ساعتها لانك هاتخسر جزء كبير من شبكتك وللاسف نسيت خالص ولم اشك انه ممكن يكون فى البيكو اللى فوقيها طبعا انا قلت بقى انى اغير قطعة اللوكو دى..لانى عملت كل اللى انتم هاتشوفوه فى الصور ومنجحتش برضه فى فك القفلة دى...غيرت السلوك اللى طالعة واللى نازلة للوكو والبيكو وغيرت السويتش وعزلت كل المشتركين واذ بى اتفاجأ ان القفلة برضه موجودة ساعتها كان لا مفر من انك هاتضحى بالمنطقة دى لانك مش قادر تحد المشكلة جاية منين..وبالتوفيق من عند الله فكرت انى ابقى لوحدى مع البيكو وافصل سلك النانو وهنا لقيت كونفليكت ايبى اشتغل بطريقة غريبة جدا
ومش قادر كمان ادخل على البيكو من تحته وانا سلك الا بعد ربع ساعة من محاولات ريبير لكارت اللان علشان اقدر ادخل بسيرعة وفى لحظات فوجئت بالماك المتسبب بالمشكلة رابط على البيكو طبعا بدون تفكير سريعا عملت بلوك للماك من على البيكو وهنا تم القضاء على علوا البينج نهائيا وراحت القفلة
حتى الان لا اعلم ايه اللى حاصل فى الماك ده بس اعتقادى ان الشخص مالك القطعة عنده حاجة من الاتى:..

(1) حاطط سويتش تحت القطعة وشغال منه وتصادف اغلاق الدائرة بدخول طرفين سلك فى السويتش وده يعمل زى الحالة دى واكتر كمان
(2) شغال ببرنامج سنوفر والبرنامج ده بيحاول اكتشاف كل الايبيهات اللى على الشبكة وبالتالى بياخد كل الايسبيهات فى ماك كارت اللان بتاع العميل
(3) كارت لان عميل عامل قفلة او السلك نفسه عامل قفلة فى الاكسس وكارت اللان

طبعا بحثت عن اى اوتوماتيك بداخل الشبكة لم اجد نهائيا شىء من هذا القبيل

انا هاسيبكم مع الصور فيها كل المشكلة وهاوريكم برضه صورة بعد حل المشكلة...
دى كانت معاناتى شهر ونصف بل اكثر كمان فى قفلة الشبكة وللاسف ساعات كمان كان بتبقى بميعاد معين وتقريبا الساعة 11 ليلا ..ودلوقت بس تاكدت ان العميل ده كان بيدخل كل يوم ليلا لكنه بقاله اسبوع سايب الجهاز شغال وقارفنى فى عيشتى

الموضوع كان صعب اوى انك تصل الى نقطة فى بحر الشبكة وتلاقيها مصدر المشكلة

الحمد لله تعالى على استطاعتى حل مشكلتى فى الشبكة ودى رسالة وتوضيح للناس علشان محدش يحصل معاه اللى حصل معايا ده ويخسر تعب وشقى سنين فى الشبكة بتاعته

بعد حل المشكلة

والحمد لله تعالى